Tuesday, August 11, 2009

Driving Lessons

Lesson Number One :)

This post has nothing to do with Rupert Grint's movie "Driving Lessons", it's about *My* Driving Lessons :D
Last Saturday, was my first lesson, supervised by my Dad ;).
Actually, I was planning for this post long time ago, but I think I'm going to switch into Arabic as my cars English vocabulary isn't that good yet :D

اخيرا... وبعد طووووول إلحاح على الباشمهندس بابا... قرر سيادته ان يحول وعوده الى افعال!

وفي الحالات اللي زي دي، لا يمكن انزل من بيتنا من غير تحميس ورفع معناويات *هايل* من عفريت العلبه (اخويا الضغير):" تبقى سلمي لي على الارصفه وعواميد النور!!!"

رحنا ااااااااااخر المدينة، حيث الجبال و الرمال والهواء الحسن. كان شارع رايح جاي، بس ماكنش فيه ولا حد رايح، ولا حد جاي، كان فاضي خالص... جو مثالي للتدريب...

اول ما ركبت مكان السواق... اترعبت!! وبدأت افكار سوداء تتزاحم في عقلي... (مش هاعرف... هاخبط العربية... هانعمل حادثه... ازاي هسيطر عليهاااا!!!! مش هاعرف... مش هاعرف... مش هااااعررررررررف!!!!)...

وهلم جره (على رأي د. عمرو)... إلا اني قررت ان لا اسمح لمثل هذه الافكار ان تسيطر عليا، وان تسلبني متعتي. فبدأت الافكار البيضا تحل مكان اخواتها السود... (اييييييييوه... دي اللحظه اللي كنت مستنياها... اكيد مش هاتكون اسوء من الـ
Python with OpernERP
زي نيد فور سبيد بالظبط... ياااه... بقالى زمااااان ملعبتش اللعبه دي)!!

دي كانت البدايه... مبشره جداااااااااا... النهايه كانت احلى... لاني قدرت امشي بالعربيه فعلا لمده نص ساعه او ساعه إلا ربع تقريبا في الشارع. كنت بلف الشارع زي ماكون بلف التراك!! يعني قدرت اني امشي في خط مستقيم وألف على الواسع والضيق كمان...

اللي في النص بقى... دا بيني وبين البشمهندس !!

بس اتعلمت عالشان تطلع ، تدوس دبرياج على الاخر خااااالص، تجيب السرعه الاولى ، وبعدين تشيل رجلك من على الدبرياج واحده واحده، وفي نفس الوقت تدوس بنزين... دوس بنزين براحه. كنت فاكره ان كل ما ندوس بنزين السرعة تزيد، بس طلع ان السرعه بتزيد من العصايه اللي في النص دي (مش فاكره اسمها). الموضوع تقريبا معتمد على الاحساس بدواسه البنزين والدبرياج و الفرامل، ودي حاجه لسه محتاجه اتدرب عليها.

بس فعلا تجربه ممتعه، ومن ساعة ما خلص الدرس الاول وانا مستنيه الدرس التاني بفارغ الصبر.

بعد ما رجعت، كان لازم احسس عفريت العلبه ان *تشجيعه* جاب نتيجه، اول ما دخلت قلت له: "شيلت 5 ارصفه، و 16 عمود، وترليتين، وبس!!!!"

يتبع... ان شاء الله
Post a Comment